2 Keunenks 09
01Ondertussen raip Elisa ain van profetenploug bie zok en zee tegen hom: "Moak die raaisveerdeg. Neem dit kroekje eulie mit en goa noar Ramot in Gilead.
02Astoe doar bist, most kieken woar Jehu, Josafat zien zeun en klaainzeun van Nimsi, touholdt. Goa noa hom tou, neem hom even apaart en breng hom noar n koamer doar je mit zien baaident allenneg wezen kinnen.
03Den most t kroekje mit eulie pakken, hom over kop gaiten en zeggen: 'Dit binnen de HEER zien woorden: Ik zaalf joe tou keunenk van Israël.' Dou deur den open en moak dast votkomst."
04Zo ging jongkerel, dij aankommende profeet, noar Ramot in Gilead tou.
05Dou e doar aankwam, zatten legerkommedanten krekt bie nkander. "Mag k even mit joe proaten, overste?" vruig e. "Wèl van ons most hebben?" zee Jehu. "Joe, overste!"
06Jehu kwam in t èn en ging mit in hoes. Doar goot profeet hom eulie over kop en zee: "Dit binnen de HEER zien woorden: Ik zaalf joe tou keunenk over mien volk, over Israël.
07Ie mouten t hoes van keunenk Achab doar ie bie in dainst binnen, oet weeg roemen. Want ik wil t bloud vergelden van profeten en van aal aandern dij mie dainden dij deur Izebel doodmoakt binnen.
08t Haile hoes van keunenk Achab zel ondergoan. Ik zel aal t manvolk van hom votmaaien, van hoog tou leeg.
09t Zel Achab zien keunenkshoes krekt zo vergoan as dat van Jerobeam, Nebat zien zeun, en as t keunenkshoes van Basa, zeun van Achia.
10 Izebel zellen honden opvreten op t laand van Jizreël. Gainent zel heur begroaven." Dou dee profeet deur open en muik dat e votkwam.
11 Dou Jehu weeromkwam bie aander ofsieren, vruigen ze: "Ales in odder? Wat mos dij maal jan aigelks van die?" "Och," zee Jehu, "dat gezoes. Dat wait ie toch wel, of nait den!"
12 "Lokst!" zeden ze, "vertel op: wat haar hai te melden?" Dou zee Jehu: "Zo en zo het e tegen mie zegd: 'Dit binnen de HEER zien woorden: Ik zaalf die tou keunenk van Israël.'"
13 Op slag deden ze aalmoal heur mantels òf en spraaidden dij op trappen veur hom oet. Dou bluizen ze op ramshoorn en raipen: "Jehu is keunenk!"
14 Jehu, Josafat zien zeun en klaainzeun van Nimsi, beroamde n komplöt tegen keunenk Joram. Dij haar mit t haile leger van Israël Ramot in Gilead verdedegd tegen keunenk Hazaël van Aram.
15 Nou was keunenk Joram weeromgoan noar Jizreël om beter te worden van wonden dij Arameeërs hom toubrocht haren dou e aan t vechten was mit keunenk Hazaël van Aram. "As ie der net zo over denken," zee Jehu, "loat we der den veur zörgen dat ter gainent oet stad ontknipt om dit aalmoal in Jizreël te melden."
16 Dou ree Jehu noar Jizreël. Doar lag Joram ja op bèr. Keunenk Achazja was ook ofraaisd om bie Joram op veziede te goan.
17 Wachtpost op toorn van Jizreël zag Jehu en zien haile tjucht aankommen. Hai meldde: "k Zai n haile tjucht volk aankommen!" Joram zee: "Stuur heur n man op peerd in muit en loat dij vroagen: 'Is t aal goud?'"
18 Ruter ging hom in muit. "Keunenk vragt," zee e, "of t aal goud is." "Hest niks mit neudeg!" was Jehu zien beschaaid. "Vooruit, achter mie aan!" Wachtpost meldde: "Hai is nou bie hom kommen, mor komt nait weerom."
19 Joram stuurde nog n man op peerd. Dou dij bie Jehu kwam, vruig e: "Keunenk vragt of t aal goud is." "Hest niks mit neudeg!" zee Jehu. "Vooruit, achter mie aan!"
20 Wachtpost meldde vannijs: "Hai is bie hom kommen, mor komt nait weerom. Mor aan zien joagen te zain, mout t Jehu, Nimsi zien zeun, wel wezen. Hai ridt ja as n gek!"
21 Joram raip: "Inspannen!" Men spande hom de peerden veur woagen en keunenk Joram van Israël en keunenk Achazja van Juda reden vot, elk op zien aigen woagen, Jehu in muit. Op t laand van Nabot oet Jizreël trovven ze hom.
22 Dou Joram Jehu zag, zee e: "Aal goud, Jehu?" "Hou kin t nou aal goud wezen," zee Jehu, "as ontucht en teuverkunsten van joen moeke Izebel aal mor deurgoan?"
23 Joram keerde woagen en muik dat e votkwam. "Verroad, Achazja!" raip e tegen dij.
24 Mor Jehu greep gaauw zien boog en schoot Joram tussen scholderbloaden. Piel ging hom dwaars deur t haart hèn en Joram zeeg op zien woagen in nkander.
25 Jehu zee tegen Bidkar, zien adjudant: "Pak hom beet en smiet hom op t stok laand van Nabot oet Jizreël. t Heugt die vervaast nog wel dastoe en ik mit ons baaident achter zien voader Achab aanreden en de HEER dizze godssproak over hom dee:
26 'Guster heb ik t bloud van Nabot en zien zeuns echt wel zain! Dat zel k joe zekerwoar vergelden op aigenste stok laand - dat binnen de HEER zien woorden.' Pak hom doarom beet en smiet hom op t laand, krekt as de HEER zegd het."
27 Dou keunenk Achazja van Juda dat zag, muik hai dat e votkwam, kaant oet van Bet-Haggan. Mor Jehu kwam achter hom heer en raip: "Moak hom ook dood!" Achazja wer roakt dou e op zien woagen helgen opree van Gur bie Jibleam. Hai kon nog ontkommen noar Megiddo, mor doar kwam e aan zien èn.
28 Dij bie hom in dainst wazzen, reden zien liggoam noar Jeruzalem. Doar hebben ze hom begroaven bie zien veurolders in Davidsbörg.
29 Achazja was keunenk van Juda worden in t elfde joar dat Joram, Achab zien zeun, regaaierde.
30 Izebel heurde dat Jehu onderwegens was noar Jizreël. Ze zette heur ogen aan, muik t hoar nuver en ging veur t roam op oetkiek stoan.
31 Dou Jehu stadspoort inkwam, raip ze: "Aal goud mit die, Zimri, moordenoar van dien keunenk?"
32 Jehu keek noar boven en raip: "Is ter ook ain dij t mit mie holdt? Nou?" Twij, drij haremkerels keken noar beneden.
33 "Smiet heur tou t roam oet!" raip Jehu. Zai smeten heur noar beneden, van dij gevolgen dat heur bloud bie stadsmuur en bie peerden omhoog sputterde. Jehu ree over heur hèn.
34 Dou trok e stad in en ging etendrinken. Dou e eten en dronken haar, zee e: "Goa ais noar dat vervlökte wief kieken en begroaf heur. t Is altied nog n keunenksdochter."
35 Ze gingen hèn om heur te begroaven, mor ze vonden aans niks meer as heur kop en heur handen en vouten.
36 Ze kwammen weerom om t te vertellen en Jehu zee: "t Is oetkommen wat de HEER deur Elia oet Tisbe veurzegd het: 'Honden zellen t liggoam van Izebel opvreten op t laand van Jizreël.
37 Izebel heur liek zel as n bultje mis op t laand liggen, op t stok laand van Jizreël en gainent zel zeggen kinnen van: Doar ligt Izebel.'"
|
